काठमाडौँ। प्रधानमन्त्री वालेन्द्र शाह (बालेन) नेतृत्वको मन्त्रिपरिषद् बैठक १७ दिनदेखि बस्न सकेको छैन। सत्तारूढ राष्ट्रिय स्वतन्त्र पार्टी (रास्वपा) भित्र प्रधानमन्त्री शाह र पार्टी सभापति रवि लामिछानेबीच देखिएको मतभेदका कारण मन्त्रिपरिषद् बैठक प्रभावित भएको चर्चा राजनीतिक वृत्तमा चल्न थालेको छ।
प्रधानमन्त्री शाह र सभापति लामिछानेबीच सरकारका महत्त्वपूर्ण निर्णय, राजनीतिक नियुक्ति, प्रहरी नेतृत्व र निजामती सेवा अध्यादेशलगायतका विषयमा मतभिन्नता रहेको बताइएको छ। दुई नेताबीच सहमति जुट्न नसक्दा मन्त्रिपरिषद् बैठकसमेत अनिश्चित बनेको विभिन्न सञ्चारमाध्यमले स्रोतलाई उद्धृत गर्दै जनाएका छन्।
प्रधानमन्त्री शाहले यसअघि साताको प्रत्येक सोमबार र बिहीबार मन्त्रिपरिषद् बैठक राख्दै आएका थिए। तर, असोज ३० गते बसेको बैठकयता नयाँ बैठक आह्वान गरिएको छैन।
यसबीच प्रधानमन्त्री शाह र सभापति लामिछानेबीच बुढानीलकण्ठस्थित लामिछाने निवासमा करिब चार घण्टा लामो छलफलसमेत भएको थियो। छलफलमा निजामती सेवा अध्यादेशको ३०–५५ वर्षे प्रावधान, नेपाल प्रहरीको नेतृत्व र राजनीतिक नियुक्तिका विषय उठेको बताइएको छ।
